Si u fsheh ngjarja për 6 orë/ Nusja vrau vjehrrën pas një debati, zbardhen detajet nga krimi në Dibër

Detaje të rënda kanë dalë nga krimi i ndodhur në Maqellarë të Dibrës, ku nusja 44-vjeçare ka vrarë me thikë vjehrrën e saj, 74 vjeç.

Mësohet se vrasja u shënua pas një debati mes nuses dhe vjehrrës.

Sipas informacioneve 44-vjeçarja me inicialet M.M., ka fshehur krimin për rreth 6-orë për tu zbuluar më pas nga bashkëshorti i saj. Nga raportimet bëhet me dije se në oborrin e banesës ku ka ndodhur ngjarja ka pasur edhe njerëz, por nuk dihet nëse ato ishin pjestarë të familjes apo jo.

Viktima ka bërtitur gjë që ka tërhequr vëmendjen, por autorja dyshohet t´i ketë thënë se nuk ka ndodhur asgjë.

Gjithashtu raportohet se autorja e krimit vuante nga probleme të shëndetit mendor. Ka qenë djali i viktimës, njëherazi bashkëshorti i autores së krimit, që ka zbuluar ngjarjen e rëndë kur është kthyer në banesë dhe ka njoftuar policinë.

Konfliktet mes nuses dhe vjehrrës kanë qenë të herëpashershme çka ka bërë që kjo e fundit të pajiset me urdhër mbrojtjeje disa herë.