Kirurgu bën të pamundurën, “i kthen gishtin e dorës në vend” pacientit 19 orë pasi e kishte “këputur”

U desh një udhëtim nga Malta në Turqi dhe aftësitë e një kirurgu, por duket se ia ka vlejtur.

Po flasim për një rrëfim të Berk Altınelli, i cili është “ribashkuar” me një pjesë të gishtit të tij tregues, të prerë.

Për Mehmet Veli Karaaltın, i cili operoi inxhinierin 29 vjeç në Stamboll, ka të ngjarë të jetë i pari rast në mjekësi kur një gisht i prerë i një pacienti “u qep” përsëri në vendin e tij, pas 19 orësh.

“Nuk ka një operacion të tillë kur një gisht bashkohet përsëri pas një kohe kaq të gjatë dhe arrin të funksionojë normalisht”, citohet të ketë thënë ai.

Altınelli ishte duke punuar në një anije kur gishti tregues i dorës së djathtë iu pre në një aksident.

Ai e vendosi pjesën e prerë në akull përpara se një helikopter ta evakuonte në spital, por mjekët atje i thanë se nuk mund të bënin asgjë dhe se ai duhet të “flakte” gishtin.

Pas një hulumtimi, familja e tij arriti te Karaaltın, një ekspert në mikrokirurgji.

Karaaltın u tha se çdo gjymtyrë e prerë duhet të qepet përsëri brenda nëntë orësh më së shumti pasi indet do të vdisnin dhe gishti do të ishte i padobishëm, por ai vendosi që gjithsesi t’i jepte një shans atij.