I doli emri te bisedat e kontrollorëve të Rinasit, lirohet pas 6 orësh ish-drejtori i Aviacionit Civil

Ish-drejtori i Aviacionit Civil Petrit Sulaj, i cili u shoqërua për tu marrë në pyetje në lidhje me pezullimin e punës së kontrollorëve në Rinas, është lënë i lirë pas gjashtë orësh qëndrimi në polici.

Ai u shoqërua pasi numri i tij i celularit doli tek bisedat e kontrollorëve ajrorë të “Albcontrol”.

Sulaj ka thënë në polici se nuk është për ndërprerje të punës por për dialog mes palëve.

Kreu i Sindikatës, Armando Fezga, përgjegjësja e turnit, Flora Ndreca dhe Muhin Mezini janë vënë në pranga pasi dyshohen se janë organizatorë të kësaj proteste dhe akuzohen për veprën penale ‘shpërdorim detyre’.

Ndërsa mbi 20 të tjerë janë shoqëruar në polici gjatë natës për t’u marrë në pyetje, ndërsa më pas janë lënë të lirë. Ndërkohë, fluturimet kanë nisur normalisht ditën e sotme në Rinas.