Çfarë e shkaktoi zjarrin në qendrën tregtare ku vdiq Arjan Sala/ Del ekspertiza

Ekspertët e shërbimeve zjarrfikëse kanë dalë në përfundimin se zjarri në magazinën e qendrës tregtare u shkaktua nga shkëndija elektrike e një neoni të vjetër.

Sipas ABC, nga hetimet ka rezultuar që neoni ishte në gjendje jo të mirë dhe gjysmë i amortizuar dhe në pjesën më të madhe të kohës qëndronte i tejnxehur.

Ngjitur me tavanin ku ishte vendosur neoni ndodhej një raft me rroba sintetike të cilat si pasojë e shkëndijës janë përfshirë menjëherë në flakë.

Përgjigja e ekspertizës ka dalë para 10 ditësh dhe është dorëzuar në Prokurorinë e Tiranës, e cila po kryen hetimet e mëtejshme. Po ashtu, edhe prokuroria ka marrë një ekspert të pavarur i cili do të vërtetojë nëse kabujt elektrikë në garazhin e qendrës tregëtare të modifikuar si magazinë, ishin apo jo të amortizuar.

Shërbimi zjarrfikës ka gjobitur me dy milionë lekë të vjetra pronarin e qendrës tregtare, për mosmarrjen e masave për mbrojtjen nga zjarri.

Magazina u pushtua nga flakët pasditen e 24 marsit. Përveç dëmeve të mëdha materiale humbi jetën edhe i riu Arian Sala.