LIGJET E BIZNESIT
Një orë para se të ndodhte masakra e Elbasanit, ku mbeti i vrarë Pjerin Xhuvani ose “Pipi”, një berber në lagjen “5 Maji” të këtij qyteti, ka raportuar në polici për prezencën e personave të armatosur në këtë lagje.
Berberi ka telefonuar sallën operative, duke treguar se kishte parë persona të armatosur dhe mund të kishte ngjarje kriminale. Pikërisht këta persona të armatosur kanë qënë eksponentë të Partisë Demokratike që veprojnë në qytetin e Elbasanit.
Kjo është foto ku njëri nga personat e armatosur, që dyshohet se është ish-efektivi i RENEA, ka zbritur nga një furgon i bardhë dhe ka hyrë në ambjentet e një lokali në lagjen “5 Maji”. Pikërisht në këtë lokal ai ka filluar të konfliktohet me një simpatizant të Partisë Socialiste që ka në pronësi automjetin “Mercedes-Benz” pa targa, që ndodhet shumë pranë vendgjarjes.
Si pasojë e konfliktit verbal ka ndërhyrë dhëndri i Pjerin Xhuvanit, 32-vjeçari Eltjon Bodinaku. Për shkak të zhurmave, nga shtëpia e tij që ndodhet në vendgjarje, ka zbritur Pjerin Xhuvani, i cili ka dashur të ndihmojë dhëndrin e tij. Por ish-efektivi i RENEA-s, është pozicionuar në sulm, duke qëlluar të parin në kokë Pjerin Xhuvanin dhe më pas edhe pse ky ka qënë i shtrirë, e ka qëlluar dhe dy herë të tjera.
Më tej, Arbër Paplekaj ka qëlluar me një plumb në qafë dhe një plumb në bark, drejt dhëndrit të Xhuvanit, 32-vjeçarit Eltjon Bodinaku, duke e plagosur rëndë këtë të fundit.
Për shkak se policia kishte marrë njoftim më parë nga berberi se në zonë kishte prezencë të personave me armë, në vendgjarje kanë shkuar zv/drejtori i policisë së Elbasanit dhe Drejtori i forcës së Posaçme si dhe një patrullë e forcës së posaçme “Shqiponja”.
Krimi i rëndë ka ndodhur në prezencë të punonjësve të policisë së Elbasanit.
Për shkak të krismave, edhe punonjësit e policisë kanë qëlluar fillimisht në ajër dhe në drejtim të autorit. Edhe ky i fundit i është kundërpërgjigjur me armë duke plagosur në këmbë punonjësen e policisë Xhensila Sota dhe vënë në rrezik punonjësit e tjerë të policisë së Elbasanit.
Në vengjarje ka dhjetëra gëzhoja, ndërsa mësohet se janë përdorur të paktën tre lloje armësh.
Policia dhe Prokuroria e Elbasanit ende nuk është në gjëndje të përcaktojë se sa herë kanë qëlluar punonjësit e policisë dhe sa herë ka qëlluar ish-efektivi i RENEA, Arbër Paplekaj.
Dyshimet flasin se Paplelaj, ka qëlluar më shumë se 7 herë duke lënë të vdekur në vend, Pjerin Xhuvanin “Pipin”, plagosur Emiljan Prengën, plagosur rëndë Eltjon Bodinakun, plagosur Pavlo Vuksanin (një ish-punonjës policie) dhe plagosur punonjësen e policisë Xhensila Sota.
Deri në këto momente është mundur të arrestohet autori i krimit, falë vetëdorëzimit të tij në Policinë e Tiranës./Oranews/
