Abuzoi me të miturën me aftësi të kufizuara mendore/ Merret vendimi për policin

Gjykata Themelore në Gjilan ka miratuar kërkesën e Prokurorisë Themelore të Gjilanit, duke caktuar masën e paraburgimit prej tridhjetë ditësh për të pandehurin me iniciale R. Sh.

“Ekziston dyshimi i bazuar se i pandehuri nga muaji nëntor 2020 e deri me datë 20.04.2021, është takuar disa herë me të dëmtuarën e mitur, e cila është person me aftësi të kufizuara mendore, me ç’rast i pandehuri dyshohet se ka ushtruar sulm seksual ndaj saj, rrethana këto të mjaftueshme për të cilat gjykata konsideron se tregojnë rrezikun potencial se poqëse i njëjti lihet në liri ai mund ta përsërisë veprën penale apo të kryej edhe ndonjë vepër tjetër penale me pasoja edhe më të rënda”, thuhet në njoftimin e gjykatës.

Dyshohet se i pandehuri ka kryer veprën penale “sulm seksual” vepër kjo e sanksionuar me Kodin Penal të Republikës së Kosovës (KPRK).

Gjyqtari i procedurës paraprake në Departamentin e Krimeve të Rënda, është shprehur se qëndrojnë arsyet ligjore për caktimin e masës së paraburgimit ndaj të pandehurit.