“Nuk e di varrin e nënës, dua t’i dërgoj lule”/ 39-vjeçarja rrëfen dhunën nga vëllezërit e sëmurë

Valdete Lleshi rrëfen në Report Tv jetën e vështirë dhe të mjerueshme që bën çdo ditë me dy vëllezërit e saj të sëmurë. Në moshën 4-vjeçe, ajo humbi babain gjatë një ndërhyrje kirurgikale në veshka. Pas kësaj ngjarje, nëna përfundoi në psikiatrinë e Shkodrës.
Sot, pas afro 31-vitesh Valdetja nuk e di ku ndodhet varri i nënës. Ajo ka mësuar se trupi i saj prehet në Shkodër.

Pas shumë vitesh mësova që trupin e mamit nuk e sollën në Has, pasi xhaxhallarët e mi nuk e kishin marrë. Nëna ime ishte rritur jetime dhe askush nuk shkoi të interesohej. Stafi mjekësor e ka varrosur aty në qytetin e Shkodrës. Dua ta di ku e ka varrin, të shkoj t’i dërgoj lule”

Sot, Valdetja është 39 vjeçe. Ajo nuk ka krijuar familjen e saj, pasi që kur xhaxhallarët i nxorën nga shtëpia, ajo kujdeset për dy vëllezërit e sëmurë. Motra i është martuar. Valdetja tregoi dhunën që has çdo ditë nga vëllezërit, si dhe problemet ekonomike, pasi askush nuk kujdeset për ata.

“Mua më dhunojnë, por unë i dua. Dy vëllezërit janë jeta ime. Ata nuk kanë pasur probleme në fillim, në moshë madhore iu shfaqën shenjat e para të depresionit. Unë kujdesem çdo ditë, që të pinë ilaçet. Jeta ime është e vështirë, kam shkuar edhe nëpër institucione, por dera nuk më është hapur”,- është shprehur ajo.