LIGJET E BIZNESIT
Mbrëmjen e sotme mbërrijnë në aeroportin “Nënë Tereza” edhe 9,360 doza të tjera të vaksinës për koronavirusin të prodhuar nga Pfizer. Dërgesa e radhës nga korporata shumëkombëshe farmaceutike u prit në aeroport nga ministrja e Shëndetësisë Ogerta Manastirliu dhe ministri për Rindërtimin Arben Ahmetaj.
Ministrja është shprehur se me këtë furnizim të mbëritur sot, do të vijohet me dozat e dyta për ata që e kanë marrë të parën ndërsa ka shtuar se më tej do të ulet edhe fasha e grup-moshave.
Tek video e siguruar nga ABC NeWs, shihet qartë edhe momenti i mbërritjes së vaksinave.
“Janë vaksinat që vijnë nga kontrata jonë me Pfizer. Vijojmë me dozat e dyta. Do të përmbyllim gjithë pjesën e vaksinimeve të kryera për stafet mjekësore, të moshuarit, stafet e shtëpive të të moshuarve dhe atyre mbi 80 vjeç. Prej prillit, vijon lëvrohet kontrata. Vijojmë edhe me vaksinimin e personave mbi 80-vjeç dhe presim sasi të tjera vaksinash, nga kontratat e tjera.”
Nga aeoroporti “Nënë Tereza”, vaksinat do të transportohen tek Instituti Shqiptar i Higjienës ku edhe do të ruhen në frigoriferët e posaçëm për t’u shpërndarë më pas në qendrat e vaksinimit. Ndërsa, ministri Ahmetaj theksoi se kompania Pfizer i ka premtuar Shqipërisë edhe 500 mijë doza të tjera, ku sipas tij, do të vijojnë të vijnë muaj pas muaji. Deri më tani, sipas raportimeve të ministres Manasterliu Shqipëria ka pritur mbi 80 mijë doza vaksinash.
