“Italia mu bë atdheu i dytë” Ish-deputeti kujton largimin e tij nga Shqipëria: Isha vetëm 13 vjeç

Sot shënohet 30 vjetori i eksodit të largimit të shqiptarëve drejt Italisë.

Kjo ditë është kujtuar në mënyrë mjaft speciale nga ish-deputeti i Partisë Demokratike Agron Shehaj.

Ai ka publikuar foton e vet kur ishte fëmijë, e cila u botua asokohe në shtypin italian.

Në moshën 13-vjeçare Shehaj ndodhet në tren bashkë me familjen për tu shpërndarë në veri të Italisë.

Postimi i plotë:

30 vjet më parë, vetëm 13 vjeç, bashkë me prindërit, ishim ndër të parët që mbërritëm me anije në Itali.

Në këtë foto jam duke udhëtuar në tren me shqiptarë të tjerë për t’u shpërndarë në veri të Italisë.

Italia m’u bë Atdheu i dytë. Aty u rrita, u maturova, u shkollova e mësova shumë.

U riktheva në Shqipëri në vitin 2005, pa para, por me një dashuri dhe dëshirë të zjarrtë për Shqipërinë. Dhe Shqipëria më dha gjithçka që mund të më jepte. Më dha mundësinë, edhe pse bashkë me të, erdhën edhe shumë vështirësi. Në Shqipëri gjeta jo vetëm suksesin, po mbi të gjitha gjeta qëllimin dhe përmbushjen njerëzore. Gjeta edhe dashurinë e jetës dhe krijova familjen time.

Ndaj në këtë përvjetor të eksodit shqiptar drejt Italisë, unë u jam më shumë se kurrë mirënjohës Shqipërisë dhe Italisë e ndihem më shumë se kurrë në borxh me të dyja. Gjithë jetën time do përpiqem t’u jap sa më shumë që të mundem! Veçanërisht Shqipërisë që ka më shumë nevojë se kurrë për të gjithë bijtë e saj, kudo që janë.