“Dy plagë kam në zemër” Emocionohet aktori Bujar Asqeriu, ka një lutje të fuqishme për Bashën

Aktori i njohur Bujar Asqeriu po pinte sot kafenë e mëngjesit në Vlorë, në momentin kur kryetari i Partisë Demokratike Lulzim Basha ka ardhur në qytetin bregdetar.

Pasi lideri i opozitës ka nisur të takojë qytetarët në rrugë dhe në sheshe, ai është ndalur dhe në tryezën e artistëve për ti përshëndetur.

Sikundër nuk pritej nga askush, Bujar Asqeriu, duke iu drejtuar si Kryeministrit të ardhshëm, i ka ngritur dy probleme madhore që shkonin përtej artit e kulturës: Problemin e madh të punonjësve të nëntokës.

“Të më falësh zoti Basha, kam dhe dy plagë në zemrën time, që po jua referoj – tha Bujar Asqeriu. – Plagën e parë e kam për naftëtarët, të cilët i kanë dhënë miliona euro këtij vendi. Dhe sot treten dobësohen dhe nuk jetojnë as me shtëpi të mira, as me shëndet të mirë.

Dhe cinizmi i tmerrshëm i Kryeministrit që u thoshte “dilni nga greva dhe pastaj më takoni mua!!!!”, është cinizëm dhe urrejtje njerëzore. Kjo është urrejtje njerëzore të mos duash njeriun! Luftë nuk mund të bësh, nuk mund të jesh drejtues i një vendi nëse nuk do njeriun, nuk do shqiptarin. Pa dashuri nuk fiton asnjë betejë! Vetëm me dashuri fitohet beteja, vetëm me respekt fitohet beteja.

Për naftëtarët – një: që familjeve të naftëtarëve që janë pa shtëpi t’u bëhen shtëpi të reja dhe infrastruktura të rregullohet e paga të jetë dinjitoze dhe për minatorët e Bulqizës – dy, që po vdesin për galeri. Shkoni në Bulqizë dhe shikoni si është gjendja e tyre e mjeruar. Si qytetarë po t’i them këto dy plagë!”