Arta Dade flet për humbjen e Bashkim Finos: Të paktën e ëma nuk e mori këtë lajm të hidhur

Ish-deputetja Socialiste Arta Dade ka reaguar mbi ndarjen nga jeta të deputetit të PS, Bashkim Finos.

Dade tregoi se lajmin e kishte marrë në mëngjes dhe ishte në dijeni të gjendjes së tij shëndetësore.

Midis të tjerash, Dade rrëfeu edhe lidhjen e ngushtë që Fino kishte me të ëmën e cila është ndarë nga jeta tre muaj para të birit.

“E mora lajmin në mëngjes. E dija që ishte pa qejf. Kam komunikuar në Janar kur e ngushëllova për humbjen e nënës. Të paktën e ëma nuk e mori këtë lajm të hidhur. Bashkimi ishte rritur jetim dhe e ëma e kishte lidhur jetën me Bashkimin.

Më erdhi në kujtesë zëri i saj kur Bashkimi mori përsipër detyrën e vështirë për të drejtuar vendin në krizën më të thellë që ka pasur vendi. Me Bashkimin jemi njohur prej 30 vitesh. Ai ishte kryetar i Bashkisë së Gjirokastër”- tha Dade për “Abc News”.

Dade vlerësoi figurën e Finos si një nga politikanët që ka kontribuar më së shumti  për Partinë Socialiste.

“Bashkim Fino nuk ishte nga ata që vetëm mori nga PS. Kjo është një marrëdhënie. Fino më shumë i dha PS-së se sa mori”- shton ajo.