‘Mamasë i kanë vjedhur vathët prej ari me diamantë’, djali bën denoncimin e tmerrshëm

Pak ditë pasi nëna e tij humbi jetën nga Koronavirusi, djali i saj i identifikuar si Mirko Marsella kishte shkuar për të marrë sendet personale. Mirëpo, në qesen plastike kishte vetëm disa veshje. Vathët e shtrenjtë mungonin.

Nëna e Mirkos, ishte e shtruar në pavijonin Marchiafava në spitalin San Camillo, në Romë.

“Ajo që ndodhi me ato vathë është një mister. Unë kam prova që nëna ime hyri në spital me ato vathë. Sa herë që më dërgonte foto nga spitali, ajo i kishte ato”,- tha Marsella.

Ai mendon se dikush ia ka hequr në momentin që ajo ka ndërruar jetë.

“Unë nuk e firmosa fletën ku duhet të kisha konfirmuar praninë e të gjitha sendeve personale të nënës sime. Unë mblodha sendet e tjera, po përgatis një letër  dhe nesër në mëngjes do të shkoj të paraqes një ankesë: ato vathë prej ari të bardhë, të cilat kishin një diamant të vogël, ishin një dhuratë dhe thoshte që donte t’i mbante me vete edhe në arkivol”,- tha Marsella, i cili pretendon se ia kanë vjedhur.