Lajm i trishtë/ Virusi i merr jetën mjekut të njohur, ishte shtruar në Infektiv

Një tjetër lajm i trishtë vjen nga bluzat e bardha.

Mësohet se mjeku i ekografisë në Berat Gëzim Lamaj, ka humbur jetën në moshën 63-vjeçare.

Ai ishte shtruar prej ditësh në Spitalin Infektiv në Tiranë dhe nuk e ka mposhtur dot virusin C OVID19.

Prej vitesh mjeku Lamaj punonte në spitalin rajonal të Beratit si ekografist dhe radioskopist.

Deputeti i Beratit Fadil Nasufi ka dhënë një mesazh ngushëllues për këtë humbje  të madhe.

Ai shprehet se ndarja nga jeta e dr. Gëzimit, pikëllon të gjithë qytetarët beratas dhe bluzat e bardha.

“Berati zgjohet sot me një lajm trishtues dhe tepër tronditës! Ndahet nga jeta pas një beteje me Covid -19 Dr Gëzim Lamaj, Mjek radiolog! Njeri i mrekullueshëm, humanist i rrallë si ai, gojëmbel, fytyrëqeshur, model i mirësisë dhe i përkushtimit ndaj qytetarëve të Beratit! Na janë shteruar fjalët nga helmi i përditshëm i vdekjes! Ndarja nga jeta e Dr Gëzimit, pikëllon gjithë qytetarët beratas dhe bluzat e bardha.

Është hidhërim i pa ngushëllueshëm, por edhe apel për kujdes nga ky virus vrastar!

Ngushëllime Dr Anilës për humbjen e bashkëshortit dhe djalit Renatos për humbjen e babait! Të prehet në paqe Dr Gëzim Lamaj! Lamtumirë Mik i cmuar!”, shkruan Nasufi.