Varianti i ri i virusit anglez nuk është i rrezikshëm për Shqipërinë, ja si e shpjegon mjeku Alimehmeti

Mjeku epidemiolog Ilir Alimehmeti ka deklaruar se në Shqipëri ka një rënie të numrit të të infektuar me C OVID19 javët e fundit.

“Rënia është në mënyrë të vazhdueshme, u bë një muaj e gjysmë që ky indikator është në rënie. Gjithashtu është në rënie indikatori i shtrimeve spitalore”, u shpreh ai.

Gjithashtu Alimehmeti nënvizoi se duke qenë se javët e fundit situata nga pandemia është qetësuar disi, atëherë ka sens dhe lirimi i masave që janë marrë.

“Në Shqipëri kemi një rast kur numrat janë në rënie. Kemi një ulje numrash dhe bën sens lirimi i masave”, tha ai.

Ndërsa përsa i përket variantit të ri të virusit që u shfaq në Britaninë e Madhe, ai tha se nuk duhet të na shqetësojë, pasi nuk shkakton më shumë dëme nga ai i pari.

“Edhe mund të ketë, por nuk na shqetëson. E para nuk është vënë re që ky mutacion të shkaktojë më shumë dëm, më shumë sëmundje dhe vdekshmëri, askund”, tha mjeku i njohur ndër të tjera.