LIGJET E BIZNESIT
Partia Socialiste ka vendosur të rikthejë sërish në skenë ish-kryebashkiakun e Shkodrës Valdrin Pjetri.
Ky i fundit mësohet se është caktuar si drejtues teknik të shtabit elektoral të qarkut të Elbasanit.
Kujtojmë se vendimi i PS vjen pasi në muajin dhjetor të 2020, gjykata rrëzoi akuzat për Valdrin Pjetrin, kandidatin fitues të zgjedhjeve për Bashkinë e Shkods në 2019 duke e shpallur atë të pafajshëm.
Pjetri është parë në takimin organizativ me strukturat e të deleguarve të rrethit Peqin, sekretariatin dhe shtabin elektoral. Me anë të një postimi në facebook, dega e PS-së në Peqin shkruan:
“Takim organizativ me strukturat e të deleguarve të rrethit, Sekretariatin dhe Shtabin Elektoral!Me prezencen e drejtuesit teknik te shtabit elektoral te qarkut Valdrin Pjetri. Për të mirën e përgjithshme të vendit, duke mos i lënë vend asgjë rastësisë, të vendosur drejt mandatit të 3”.
Në vitin 2019, kur fitoi zgjedhjet si kryetar i Bashkisë së Shkodrës, PD e akuzoi se kishte marrë dënim në Itali për trafik droge dhe nuk e kishte deklaruar në formularin e dekriminalizimit duke shkelur ligjin.
Pas akuzave të opozitës Vladrin Pjetri nuk u betua si kryebashkiak duke u shprehur se ishte i gatshëm të hetohej. Nga tërheqja e Pjetrit vendi iu la Voltana Ademit, e cila po drejton ende Shkodrën përtej mandatit.
Vendimi i Gjykatës për pushimin e çështjes mori formë të prerë në datën 17 dhjetor. Sipas organit të akuzës mësohet se ish-kryebashkiaku nuk mund të deklaronte dënimin për shkak se kështu ishte kërkuar nga Gjykata në Itali.
