Ambasadorja Kim i drejtohet Ramës, Bashës e Kryemadhit: Një person i përjashtuar nga vetingu s’mund të pranohet në tjetër parti!

Ambasadorja e Shteteve të Bashkuara të Amerikës, Yuri Kim e ftuar në emisionin “Real Story” në News 24 me Sokol Ballën ndryshe nga postimet e saj në rrjete sociale iu drejtua njëherësh me një mesazh krerëve të politikës shqiptare me qëllim që siç tha, asnjëri prej tyre të mos e interpretojë sikur mesazhi është për tjetrin.

Teksa e vuri theksin tek zgjedhjet e 25 prillit, për të cilat tha se duhen siguruar elementët teknikë, zonja Kim komentoi edhe rrjedhjet e politikanëve nga një parti në tjetrën dhe dha mesazhin e qartë se një parti nuk duhet të pranojë vetëm për avantazh politik një individ që nuk e ka kaluar vetingun tek një parti tjetër.

“Po i flas Z. Rama në cilësinë e tij si kreu i PS; po i flas Z. Basha si kreu i PD; po i flas edhe Znj. Kryemadhi; po i flas kujtdo që drejton një parti politike. Është përgjegjësia juaj dhe po ju flas ju. Pra, askush nuk mund të ngatërrohet sikur po i flas palës tjetër. Dhe diçka tjetër. Dëgjoj edhe për njerëz në partitë politike, udhëheqësit politikë në veçanti, duhet të luajnë ndershëm dhe duhet të jenë të ndershëm. Dhe një element i kësaj është se kur një parti përjashton dikë sepse ai person nuk kaloi vetingun në partinë e tyre, ai person nuk duhet marrë nga një parti tjetër për avantazh politik. Kjo nuk është e pranueshme dhe ky është pozicioni i Ambasadës së SHBA por besoj është edhe pozicioni i popullit shqiptar. Mendoj se duan politikë më të pastër. Mendoj se duan gjykata më të pastra. Mendoj se duan udhëheqësi të vërtetë, të ndershme nga partitë politike dhe unë jam me ta”, është shprehur ambasadorja amerikane.

Kujtojmë se një rast i tillë ishte ai i Gledion Rehovicës (LSI) i djegur nga dekriminalizimi dhe që së fundmi i është bashkuar PS. (Balkanweb)