Aksidentoi për vdekje kalimtarin dhe u largua, arrestohet shoferi 22-vjeçar

Një aksident i rëndë ndodhi mbrëmjen e djeshme me pasojë vdekjen e një këmbësori.

Policia bëri me dije se ka arrestuar drejtuesin e automjetit, i cili pas aksidentit u largua nga vendi i ngjarjes.

Sipas uniformave blu, në pranga ra shtetasi me iniciale E.J 22 vjeç, banues në fshatin Rëmenj.

“Specialistët e Sektorit të Policisë Rrugore në DVP Korçë, në vijim të veprimeve hetimore dhe procedurale të kryera për zbardhjen e rrethanave dhe dokumentimin e ngjarjes së ndodhur më datë 24.01.2021, në fshatin Buçimas, Pogradec, ku u aksidentua me pasojë vdekje këmbësori P. Gj., bënë të mundur identifikimin dhe kapjen e autorit të dyshuar së bashku me mjetin tip “Benz”, të cilin ky shtetas drejtonte. Në përfundim të veprimeve, u arrestua në flagrancë për veprat penale “Shkelja e rregullave të qarkullimit rrugor” dhe “Largimi nga vendi i aksidentit”, shtetasi E. J., 22 vjeç, banues në fshatin Rëmenj, Pogradec”, tha Policia.

Aksidenti ndodhi mbrëmjen e djeshme

“Më datë 24.01.2021, rreth orës 21:40, në aksin rrugor Korçë-Pogradec, në afërsi të fshatit Buçimas, Pogradec, një automjet dyshohet se ka aksidentuar këmbësorin shtetasin P. Gj., rreth 48 vjeç, banues në Pogradec, i cili për pasojë ka gjetur vdekjen”, tha policia.