“Po nxisni një konflikt” Ministri Lleshaj revoltohet pasi Lala i nxjerr dokumentin: Policia e dinte kush ishte vrasësi

Një përplasje ka ndodhur mbrëmjen e djeshme mes ministrit të Brendshëm Sandër Lleshaj dhe gazetares Klodiana Lala.

Debati erdhi në lidhje me situatën e krimit në Shqipëri.

Lala publikoi një dokument sipas  të cilit, Preng Gjinit që iu bë atentat në Tiranë, është i dyshuar si autor i vrasjes së Gazper Reçit, në Itali, konflikte që nisën si pasojë e prishjes së pazareve të drogës në shtetin italian.

Bazuar në dokumentin që kishte në dorë, Lala tha se ky është një dështim i Policisë së Shtetit që nuk ka mundur të parandalojë atentatin në Tiranë, kundër Preng Gjinit.

“Ky është dokumenti zyrtar i Policisë. E preva për të qenë korrekte dhe për të mos larguar ata punonjësit e policisë. Ja ta lexoj çfarë shkruhet. ‘Sipas informacioneve të siguruara na rrugë operative rezulton se kjo ngjarje ka ardhur si pasojë e konflikteve të ashpra, gjakmarrje/hakmarrje që familja gjini ka me familjen Reçi nga qyteti i Rrëshenit.

Këto konflikte janë si pasojë e prishjes së pazareve të drogës në shtetin italian, ndërmjet shtetasit Gasper Reçi me të dëmtuarin Preng Gjini. Sipas të dhënave shtetasi Gaspër Reçi është vrarë në shtetin Italian në vitin 2017. Si pasojë e këtyre konflikteve në vazhdim në datën 12.08.2019 në qytetin e Rrëshenit është vrarë Armando Gjini, vëllai i të dëmtuarit Preng Gjin, si dhe ngjarja e ndodhur në qytetin e Tiranës në datën 15.09.2020 ku është dëmtuar rëndë shtetasi Preng Gjini’. A ka dështuar policia e shtetit të parandalojë një ngjarje kaq të rëndë?”- tha Lala.

“Nuk ka dështuar fare. Aspak! Aty flitet për informacion të siguruar në rrugë operative. Edhe një thashethem merret në rrugë operative. Nuk mund të thuhet se Policia e ka ditur autorin dhe nuk e ka arrestuar. Po nxitni një konflikt. Janë vrarë njerëz, është e vërtetë dhe është një situatë e pasqaruar,”- tha Lleshaj.