“I ka qëlluar disa herë” Drejtori i Policisë flet për vrasjen e dyfishtë në Astir: Dy fëmijët e mitur panë gjithçka

Në ditën e fundit të vitit drejtori i Policisë së Tiranës Rebani Jaupi ka dhënë detaje për vrasjen e dyfishtë që tronditi kryeqytetin mëngjesin e sotëm.

Gjatë një prononcimi për mediat, Jaupi është shprehur se e gjithë ngjarja në zonën e Astirit ka ndodhur në prani të dy fëmijëve të mitur të njërës prej viktimave, të cilët fatmirësisht kanë shpëtuar pa lëndime.

Edhe njëherë ai ka bërë apel që kushdo që sheh Përparim Telën (Ademin) të njoftojë Policinë për të bërë të mundur neutralizimin e tij nga ana e efektivëve.

“Sot në 10:12 ka ardhur një telefonatë se në Astir ka të shtëna me armë zjarri. Policia ka ardhur në vendin e ngjarjes dhe kemi konstatuar 2 viktima. Autori është bashkëjetuesi i një prej motrave. Ka gjuajtur disa herë më automatik, e ka lënë në banesë dhe është larguar në këmbë mbrapa pallatit. Është larguar me ecje të shpejtë. Kemi dhënë fotografinë e autorit dhe kemi shpërndarë njoftimin. Grupi po vazhdon me dokumentimin e plotë të ngjarjes. Po marrim të gjitha provat dhe do të pyeten edhe dëshmitarët. Në vendngjarje ishin edhe dy fëmijë të mitur, deri në moshën 16 vjeç. Kanë dhënë dëshminë e tyre paraprake se çka ndodhur në të vërtetë,”-tha Jaupaj.

Kujtojmë se dy motrat Kristina Bardhi dhe Zhaneta Metani janë vrarë me breshëri kallashnikovi nga bashkëjetuesi i njërës prej tyre.

59-vjeçari shqiptar i Maqedonisë së Veriut, i identifikuar si Përparim Tela (Ademi) nuk e ka pranuar dot ndarjen dhe në sherr e sipër ka qëlluar ndaj bashkëjetueses së tij, por plumbat nuk kanë kursyer të motrën. Ndërkohë që Policia e Shtetit ka nisur punën për kapjen e autorit të ngjarjes.