E rëndë/ Dyshohet se ishte infektuar nga virusi, shoferi i ambulancës gjendet i pajetë në banesë

Një ngjarje e rëndë raportohet se ka ndodhur mbrëmjen e djeshme në Berat.

Mësohet se një shofer ambulance i Spitalit Rajonal të qytetit është gjetur i pajetë në banesë nga të afërmit e tij.

Sipas informacioneve bëhet fjalë për 60-vjeçarin Shkëlqim Metolli, i cili ndodhej disa ditë me raport në shtëpi, për shkak se ishte i sëmurë.

Ai kishte shfaqur shenja të dukshme të C.OVID19 dhe për shkak se jetonte i vetëm, familjarët i kishin kërkuar të bënte tamponin por nuk kishte pranuar.

Disa ditë pas përkeqësimit të gjendjes së tij shëndetësore,të cilën po e trajtonte në shtëpi me medikamente,Metolli ka pësuar një arrest kardiak dhe ka gjetur vdekjen.

Burime të brendshme nga Spitali Rajonal i Beratit bëjnë me dije se është kërkuar nga ana e familjarëve ekzaminimi i kufomës për të mësuar nëse ishte i prekur apo jo nga C.ovid-19.

Dyshimet se shoferi i ambulancës ishte i prekur nga C.ovid-19 janë hedhur edhe nga kolegët e tij dhe mjekët e spitalit,që konfirmojnë se Metolli kishte shfaqur edhe gjatë ditëve të fundit të punës shenja të lodhjes fizike dhe temperaturë të vazhdueshme.

Shkëlqim Metolli punonte prej 34-vjetësh si shofer ambulance në Spitalin Rajonal të Beratit, ndërsa këtë vit kishte punuar në vijën e parë të luftës kundër C.ovid-19, duke transportuar çdo ditë të sëmurët në gjendje të rënduar nga Spitali i Beratit drejt spitaleve C.ovid në Tiranë.