“Shqipëria rrezikon destabilizim” Jozefina Topalli lëshon paralajmërimin e fortë: Nuk ka ndodhur asnjëherë më parë

Ditën e sotme është regjistruar zyrtarisht në forca politike “Lëvizja për Ndryshim”, e cila drejtohet nga Jozefina Topalli.

Ish-kryeparlamentarja ka folur për situatën pandemike, duke vënë theksin dhe tek problemet që përballen qytetarët shqiptarë, si largimi nga vendi i rinisë dhe varfëria e tejskajshme.

“Asnjëherë gjatë kësaj periudhe nga 97’ nuk ka ndodhur që vendi jonë ta ketë 43% varfërinë ekstreme, që 43% e popullsisë tonë jetojnë me më pak se 5$ në ditë. Kjo është një shifër e frikshme për çdo politikan në qeveri apo në opozitë, do t’i bënte pyetjen vetes se pse e lamë që ky vend të rrëshqasi deri në pikën që duket se është buzë greminës, duke i lënë vendit tonë vetëm dy rrugë. Rruga e parë që është rruga më e frikshme dhe më e rrezikshme që mund të çojë në destabilizim të vendit, sepse kur ke një vend me gjysmën e popullsisë që jetojnë në varfëri ekstreme sigurisht që ai nuk ka asgjë tjetër për të humbur se për t’u ngritur dhe për të fshirë çdo gjë që gjen përpara, por kjo do ishte një kosto e pallogaritshme dhe kriza do të merrte përmasa akoma dhe më të frikshme, dhe rruga e dytë rruga për të votuar një alternativë tjetër.”

Nga ana tjetër, Topalli tha se “Lëvizja për Ndryshim” lindi si nevojë për t’i dhënë shqiptarëve një alternativë, sepse ka shumë nga shqiptarët të cilët nuk bien dakord me mënyrën e qeverisjes së kryeministrit Rama, nuk e pranojnë partinë e Metës dhe nuk kanë besim tek Lulzim Basha.

“Po përmend tre emra për faktin se të gjitha zhviillimet politike kanë çuar në një mënyrë tjetër të sjelljes politike nqs përpara jeta politike kishte theksin në dy apo tri forca poltike, ajo sot është monopol i tre emrave, dhe pikërisht për të larguar këto tre kryetarë është e nevojshme që të kemi një alternativë të re dhe Lëvizja për Ndryshim vjen si mundësi dhe si alternativë që i jepet qytetarëve nëse ato nuk bijnë dakord me tre emrat të cilët deri tani kanë mbajtur peng vendin, dhe e kanë çuar në këtë situatë ekonomike dhe politike, pasigurie dhe pabarazie vendin, si prej 20 vitesh.”, ka deklaruar ish-kryetarja e parlamentit në “Vizion Plus”.