Përlotet stafi i spitalit, pacienti i intubuar luan me violinë (Video)

Një pacient i intubuar për shkak të infektimit me Co vid-19 është filmuar duke luajtur në violinë nga shtrati i tij në spital, ndërsa trajtohej në një pavijon të kujdesit intensiv.

Grover Wilhelmsen, një mësues në pension i muzikës dhe shitës violinash gjendet i shtruar prej muajsh në spitalin ‘McKay-Dee’ në Ogden, Utah.

Por pavarësisht kësaj ai nuk i humbet shpresat. Grover luan me plot pasion në violinën e tij ndërsa ishte ende i lidhur me aparatet e frymëmarrjes në shtrat.

Grover i komunikoi stafit dëshirën e tij për të luajtur me violinë në një copë letër, pasi ai nuk është në gjendje të fliste. Gruaja e tij Diana më pas solli një violinë e disa libra muzikorë në spital dhe ai luajti për disa orë gjatë dy ditëve.

‘Na solli lot në sy. Për të gjithë stafin është e pabesueshme për të parë një pacient duke bërë këtë ndërsa gjendet i intubuar,” tregojnë infermieret për mediat amerikane.

Aktualisht Grover është i pafuqishëm për të lëvizur dhe folur, gjithsesi shëndeti i tij po shkon drejt normalitetit dhe shumë shpejt pritet të lë spitalin.