“Jemi të vd*kur”, mbahem me pensionin e vjehrrës/ Situata kritike në Vlorë, ja çfarë po ndodh

Pandemia ka dhënë ndikim të drejtpërdrejtë në uljen e shpenzimeve të qytetarëve në të gjithë vendin. Në tregun e konfeksioneve të qytetit të Vlorës rënia e shitjeve është drastike teksa ka sjell mbylljen e një numri dyqanesh.

Tregtarët e Vlorës thonë se janë duke u përballur me uljet më të mëdha të shënuara ndonjëherë dhe se kjo po i çon drejt falimentit. Ata shtojnë se me gjithë situatën nuk kanë pasur asnjë mbështetje financiare nga shteti, taksat e bashkisë i kemi paguar të gjitha, edhe pse është e dukshme që tregu qëndron bosh.

Lidhur me efektet e pandemisë më herët edhe dhoma e tregëtisë Vlorë ka deklaruar se janë qindra subjekte biznesi të pakicës që kanë ulur qepenin për shkak të falimentit.

Gazetarja e Fax news Afrovita Hysaj ka pyetur disa prej tregtarëve, të cilët thonë se çmimet janë ulur, dhe sërish nuk ka pasur lëvizje të qytetarëve, ndërkohë që shtojnë se nuk çojnë asgjë në familjet e tyre.

“Shumë keq, dobët fare, nuk ka shitje. Siç erdha do iki për në shtëpi, ka rënë shumë fare. Po mos të kem pensionin e vjehrrës shumë keq, unë sot për be nuk shita asnjë gjë. Taksat i paguajmë të gjitha, kemi paguar dhe për ditët që kemi qenë pushim, i kemi paguar të gjitha, nuk kemi marrë asnjë lloj mbështetje fare, as pagë lufte, asgjë”, shprehet një prej tregtareve.

“Ça mbështetje thua, ne jemi të vdekur”, shprehet një tjetër qytetar.

Gazetarja Hysaj shprehet se në tregun e fruta-perimeve, situata duket të jetë më e mirë, pasi pavarësisht krizës ekonomike, qytetarët janë të detyruar që të blejnë ushqimet bazë, ndërsa për veshje dhe orendi shtëpiake një pjesë e mirë e tyre tregohen më dorështrënguar./