Gazetari amerikan i del në mbrojtje Hashim Thaçit

Gazetari i njohur amerikan Geraldo Rivera i ka dalë në mbrojtje ish-presidentit të Kosovës Hashim Thaçi, pasi ky i fundit akuzohet për krime lufte nga Gjykata Speciale e Hagës. Me anë të një postimi në Twitter, Rivera shkruan se e ka takuar Thaçin gjatë agresionit serb mbi Kosovën dhe shton se ai ishte një patriot që luftonte për të mbrojtur popullin e tij kundër një armiku shumë më të madh e vrastar.

“Nuk i di specifikat e akuzës ndaj Hashim Thaçit, por pasi që e kam takuar gjatë ditëve të errëta të agresionit serb mbi Kosovën, mund të them se ai ishte një xhentëlmen dhe patriot që luftonte për të mbrojtur popullin e tij kundër një armiku shumë më të madh e vrastar. Shumë shqiptarë vdiqën në këtë luftë”, shkruan Rivera.

Video e plotë:

Tashmë Krasniqi, Thaçi, Veseli dhe Selimi janë të prangosur në Hagë. Një natë më parë, Dhoma e Specializuar konfirmoi aktakuzën kundër ish-presidentit Hashim Thaçit, dy ish-kryeparlamentarëve Kadri Veselit, Jakup Krasniqit dhe Rexhep Selimit, që aktualisht ndodhen në dhomat e paraburgimit. Të katër zyrtarët më të lartë të Kosovës, akuzohen për arrestim të paligjshëm, vrasje dhe torturë, të cilat konsiderohen si krime lufte. Në aktakuzën e publikuar shkruhet se nga marsi i vitit 1998 deri në shtator të një viti më vonë, në Kukës dhe Cahan janë kryer krime ndaj qindra civilëve që nuk ishin pjesë e luftës së UÇK-së.