A do të merren masa të reja shtrënguese? Eksperti zbulon skenarët: Ja çfarë pritet javët e ardhshme në Shqipëri

Pandemia vijon të jetë një nga temat më të diskutuara në Shqipëri, kryesisht në rradhët e ekspertëve të shëndetësisë.

Së fundmi epidemiologu në ISHP Artan Simaku ka deklaruar se pritet një rritje e lehtë e shifrave të të prekurve nga C.OVID19.

Sipas tij stina e dimrit do të sjellë më shumë të infektuar, dhe shtoi se masat që do të aplikohen tani do të japin rezultat mbas 3 javësh.

“Të rëndësishme janë mbajtja e distancës dhe higjiena. Masat janë themelore, sikundër edhe mbajtja e maskës, që i shërbejnë ndërprerjes së rrugës së transmetimit të virusit”, tha Simaku për “Abc News”.

Eksperti shtoi se strategjia e testimeve ka qenë që në fillim te grupet prioritare, dhe OBSH po afrohet te kjo strategji që është aplikuar në Shqipëri.

Simaku theksoi se nuk përjashtohet mundësia e masave të tjera, në varësi të situatës epidemiologjike.

“Masat kanë ndikim si në aspektin ekonomik ashtu edhe social, por në situata epidemiologjike, duhet marrë në varësi të asaj që ndodh”, tha Simaku.

Sipas tij nga hetimi epidemiologjik nuk parashikohet rritja e rasteve mbi 1 mijë.

“Duhet parë se cili nga viruset do të mbizotërojë në muajt në vijim, pra C.ovid-19 apo gripi stinor. Njëri prej tyre do të mbizotërojë, por duhet parë”, tha ai.