Seanca e sotme parlamentare është shoqëruar me tensione dhe brenda godinës së Kuvendit.
Ndryshe nga herët e tjera, deputetja Rudina Hajdari ka folur me tone të ashpra në drejtim të deputetëve të mazhorancës direkt nga foltorja e parlamentit.
Pas replikës me deputeten e PS, Elisa Spiropali, Hajdari ka akuzuar politikanët shqiptarë se në 30 vite janë pasuruar vetë, duke e lënë popullin në baltë.
Gjithashtu Hajdari nuk ka pranuar të lëvizë nga foltorja duke e bllokuar atë, dhe për pasojë kryetari i parlamentit Gramoz Ruçi ka ndërprerë seancën duke kërkuar 15 minuta pushim.
“15 minuta pushim nga seanca që t’i thërrisni arsyes, hera e parë që na ndodhë me një zonjë”, u shpreh në fjalën e tij Gramoz Ruçi.
Në fjalinë e saj me tone të ashpra, Hajdari ka bërë thirrje për reflektim që të hapen listat.
“Ju garantoj që këtë muaj shtator nuk kam reshtur duke iu takuar dhe duke marrë mendimet tuaja, dhe unë sot flas për ata shqiptarë që janë treguar shumë të të mençur se ata që kam takuar në këtë sallë. Ata e dinë shumë mirë që në këtë sallë ka vetëm mashtrime, këtu bëhen vetëm pazare, e dinë që kur kjo seancë përfundon, shumica ulen dhe bëjnë pazare dhe e shesin veten si patriot.
Ka qenë kjo sallë plenare ku në 1992 i premtuar shqiptarëve që do të dënoni krimet e komunizmit, i mashtruat se nuk i bëtë, po unë jam me ata që janë të zhgënjyer se ju nuk e bëtë këtë, ka qenë kjo sallë ku ju u thatë shqiptarëve futini lekët në firma piramidale dhe e çuat vendit në tmerret më të mëdha që kanë kaluar, jam me ata që janë të zhgënjyer se ju i mashtruat ka qenë kjo sallë në 1998 se do ua ktheni lekët që do ua ktheni lekët e humbura në firmat piramidale,.
Ka qenë kjo sallë prej 30 vitesh që u ka thënë shqiptarëve që në 2001 që do futeni në BE, sot është 2020 dhe ja ku jemi sot. Sot shqiptarët po ikin me kamion në Angli dhe Hollandë. Ka qenë kjo sallë se nuk do impononi plehra dhe në fund miratoni ligjin, dhe sot po tentoni t’i urdhëroni votën parapëlqyese, por në fund do e vendos unë.
Mos u hiqni si patriot sikur e doni këtë vend, ju bëj thirrje reflektoni, ndaleni këtë seancë të turpshme që iu bëni qytetarëve, se jemi këtu për ata dhe jo për t’iu një grup njerëzish. Hapni listat se Kodi Zgjedhor ndryshohet një herë jo sa herë keni qejf ju, jepini mundësinë shqiptarëve të votojnë atë që duan, të ikin në kosh plehra. reflektoni deputetë, ndaloni këtë seancë dhe mos u bëni pjesë e këtij aktrimi të shëmtuar, çfarë do bëj, nuk e lë foltoren”, tha Hajdari.