LIGJET E BIZNESIT
Kryetari i Partisë Demokratike Lulzim Basha ishte i pranishëm sot në Lushnje, ku pas takimeve me disa fermerë të zonës, është njohur me problematikat e tyre.
Basha u shpreh gjatë një prononcimi për gazetarët se në përfundim të takimeve kishte zbuluar “gropën” ku sipas tij janë vjedhur24 milionë euro.
Sipas kryedemokratit bëhet fjalë për vendin ku duhej të ishte ndërtuar inceneratori i Fierit.
Basha shtoi se këto para mund të kishin shkuar në xhepat e familjeve në nevojë apo në formën e subvencioneve te fermerët.
Ai u zotua se SPAK do të detyrohet të hetojë aferën e inceneratorit dhe të çojë pas hekurave këdo që është përfshirë në vjedhje.
Pjesë nga fjala e Bashës:
Sektori i bujqësisë dhe blektorisë, janë më të goditurit në krizë. Arsyeja e krizës në Shqipëri nuk është vetëm pandemia. Fermeri shqiptar është më i diskriminuari. Paratë e subvencionimit, thertoret, magazinat… këto para merren nga qeveritarët dhe shkojnë për afera korruptive. Në Fier ka një gardh ku janë zhdukur 24 milion euro të taksave. Kjo ndërtesë quhet inceneratori i Fierit, është një gropë. Imagjinoni se çfarë mund të bëheshin me 4 milion euro, mund të ndihmoheshin 24 mijë biznese, shumë më shumë se çfarë ka qarku i Fierit. Mund të ndihmoheshin dhjetëra mijëra familje që kryefamiljari ka humbur punën. Mund të paguheshin qindra-mijëra pensionistë. Mund të jepeshin mbështetje direkte, subvencione për qindra fermerë të Myzeqesë. Por Edi Rama, Arben Ahmetaj dhe Klodian Mërtiri kanë vjedhur 24 milion euro. SPAK do detyrohet ta hetojë dhe të çojë pas hekurave këdo që është përfshirë në këtë vjedhje masive. Për këtë dua të zotohem sot.
