Reshjet e dendura të shiut, disa qytete nën ujë

Reshjet e shumta të shiut që kanë pushtuar pothuajse të gjithë qytetet e vendit tonë, kanë sjellë edhe probleme. Në Durrës dhe në Vlorë, raportohet se ka bllokime të akseve kryesore rrugore, ndërkohë prezenca e shtuar e ujit nëpër rrugë, e vështirëson lëvizjen e këmbësorëve dhe të automjeteve. Bashkia Vlorë, u ka bërë thirrje qytetarëve që të shmangin lëvijzet me automjete dhe ato në këmbë, që nuk janë të domosdoshme.

“Të dashur qytetarë! Duke parë kushtet e motit në Vlorë, por edhe në të gjithë vendin, do ju luteshim të shmangni lëvizjet me makina që nuk janë të domosdoshme. Për shkak të shirave të dendur, duhet të keni kujdes edhe me vendin e parkimit të makinave dhe të jeni të vëmendshëm për vendet që rrezikojnë të përmbyten! Paralajmërimet e meteorologëve për shira të vazhdueshëm, na bëjnë të jemi të kujdesshëm. Kujdesuni për veten dhe familjarët tuaj! Për çdo nevojë vendosni kontakt me Ujësjellës Kanalizimet dhe Shërbimet publike të Bashkisë,”- shkruhet në postimin e bashkisë.

Ndërkohë, e gjithë java që sapo ka nisur parashikohet të jetë me shira të dendur. Temperaturat kanë zbritur goxha në krahasim me ato të javës që lamë pas, duke lajmëruar ardhjen e dimrit. Vlerat luhaten nga 9-20 gradë Celsius.