Presidenti Ilir Meta ka dalë në një konferencë urgjente përpara gazetarëve.
Gjatë fjalës së tij ai ka deklaruar se ka “dyshime të arsyeshme” se zyrtarë të korruptuar të qeverisë bashkëpunojnë kundër shtetit në Arbitrazh, pasi kanë rënë dakord me investitorët.
Kjo sipas Metës e bën vendin që të shkojë drejt një katastrofe financiare.
“Ka dyshime të arsyeshme për një lojë të dyfishtë të zyrtarëve të korruptuar të qeverisë që përfitojnë dhe nga kompania e cila merr apo trashëgon aktivitetin e investitorit të cilit i zgjidhet kontrata, por dhe bashkëpunojnë dhe me investitorin që humbet në arbitrazh, duke mos mbrojtur sic duhet shtetin. Dhe në këtë mënyrë ne shkojmë drejt një katastrofe financiare. Ky është shqetësimi im. Unë punoj me shkresa sepse di të ndaj atë cka është shtetërore, institucionale nga ajo që mund të jetë politike ose personale”, tha Meta.
Më pas ai lëshoi akuza dhe në drejtim të kryeministrit Edi Rama duke u shprehur se është ai që i jep porositë por firmat i hedhin të tjerët, dhe kur votohet në Parlament “bën sikur flet në telefon dhe del jashtë”.
“Zotëria në fjalë asnjëherë nuk firmos vetë, jep porosi pastaj firmosin të tjerët. Edhe në qeveri edhe në Parlament. Në paralament janë më skandaloze se bën sikur flet në telefon kur votohet dhe del përjashta. Cdo zyrtar i thjesht ta mbajë mend sot, se për cdo gjë që firmos do mbajë përgjegjësi të drejtpërdrejtë nesër. Se të vazhdohet në këtë mënyrë ky shtet shembet”, shtoi Kreu i Shtetit gjatë fjalës së tij.