Ngjarje e pazakontë në avion/ Pasagjerët ankohen për erën e keqe, piloti i nisur drejt Veronës bën ulje emergjente

Një ngjarje e pazakontë u regjistrua gjatë një fluturimi të British Airways për në Verona.

Piloti bëri ulje emergjente në London Heathrow, pasi pasagjerët u ankuan se ndjenin erë djegie dhe disa anëtarë të ekuipazhit filluan të mos ndiheshin mirë.

Aeroplani Airbus A320-232, ishte nisur për në qytetin italian dhe u kthye përsëri në aeroportin e Londrës, pas asaj që linja ajrore e përshkroi si ”çeshtje teknike’‘ .

Ishte një dëshmitar në vendngjarje i cili zgjodhi të shpërndante në rrjetet sociale një video të makinave zjarrfikëse dhe automjeteve të tjera të urgjencës në aeroport pas kthimit të aeroplanit.

Megjithatë, kompania British Airways, iu drejtua udhëtarëve vetëm me një mesazh:

”Ne ju kërkojmë falje për vonesën e fluturimit tuaj. Na u desh të ktheheshim përsëri në Londër, për shkak të një çështje teknike. Siguria juaj është prioriteti jonë numër një dhe ne kurrë nuk do të vazhdonim një fluturim nëse nuk është e sigurt për ta bërë këtë. Tani jemi në proces të rregullimit të një avioni të ri në mënyrë që të jemi në gjendje t’ju çojmë në destinacionin tuaj.’’

Pasagjerët u transferuan nga Airbus A320, në një aeroplan tjetër të të njëjtit model për të vazhduar fluturimin e tyre.