“Nëse nuk…” Lefter Maliqi bën premtimin ‘live’ nga Kuvendi: Unë do largohem përfundimisht nga politika

Në seancën e sotme parlamentare, ka folur dhe deputeti i opozitës së re Lefter Maliqi.

Ky i fundit ka theksuar se mazhoranca ka frikë për zgjedhjet e ardhshme dhe prandaj kërkon të miratojë ndryshimet në Kodin Zgjedhor.

Gjithashtu Maliqi e konsideroi seancën e sotme si një seancë turpi.

Ndër të tjera, deputeti paralajmëroi se opozita e bashkuar do të fitojë zgjedhjet, pavarësisht të gjithave.

Madje ai premtoi se nëse nuk fiton e djathta e bashkuar në Berat, do të largohet përfundimisht nga politika.

“Sot është një seancë turpi, e pështirë e Rilindjes, me këtë po tregojnë frikën që kanë për zgjedhjet. Ku janë këta trima? Pse kanë frikë të ndryshojnë koalicionet, pse nuk duan të hapin listat? Këta kanë pushtetin në dorë. Ju sot po gënjeni dhe mashtroni të gjithë shqiptarët. Çfarë do që të bëni, ju nuk do të fitoni  në zgjedhjet e ardhshme. Nëse nuk fiton e djathta e bashkuar në Berat unë do të largohem përfundimisht nga  politika”, u shprehet Lefter Maliqi.