“Më vjen keq që do zhgënjehen patriotët” Në krah të Dendias, Rama jep lajmin e madh për çështjen e detit më Greqinë

Në konferencën e përbashkët për shtyp me ministrin e Jashtëm Grek Nikos Dendias, kryeministri Edi Rama ka dhënë lajmin se Shqipëria dhe Greqia do ti drejtohen drejtësisë ndërkombëtare për zgjidhjen e kësaj çështjeje.

Kreu i qeverisë ka zbuluar se bashkë me Dendias kanë rënë dakord që së bashku t’i drejtohen instancave ndërkombëtare për të zgjidhur këtë çështje të debatuar.

Ndër të tjera Rama shtoi gjatë fjalës së tij se asnjë çështje nuk është e pazgjidhshme dhe nuk do të ketë asnjë pushtim të Shqipërisë nga Greqia nëpërmjet detit.

”E kam shumë të qartë që të gjithë i kanë veshët e hapur lidhur me pushtimin e ardhshëm që Greqia do i bëjë Shqipërisë mes detit. Nuk do ketë pushtim. Më vjen keq që do zhgënjehen patriotët e detit.

Mund ta them me kënaqësi sot, se kemi rënë dakord me Greqinë që këtë çështje ta trajtojmë në instanca ndërkombëtare. Do i drejtohemi së bashku drejtësisë ndërkombëtare.”- tha Rama.

Kryeministri Rama gjithashtu nëpërmjet këtij lajmi ka sumuar edhe ata që e akuzuan për marrëveshjen e detit duke thënë se i vjen keq për ‘patriotët e detit’.