Arrestohet ish-drejtori i Autoritetit Kombëtar të Burimeve Natyrore Klodian Gradeci.
Mësohet se 45-vjeçari ra në pranga në aeroportin e Rinasit teksa po kthehej nga Turqia.
Ai akuzohet se i ka shkaktuar shtetit një dëm prej 2 milion dollarësh.
Gradeci ishte shpallur në kërkim që nga data 6 tetor, ndërkohë që Gjykata e Tiranës ka caktuar ndaj tij masën e sigurisë “arrest me burg”, pasi akuzohet për shpërdorim detyre.
“Në vijim të punës për kapjen e personave të shpallur në kërkim në kuadër të operacionit policor të koduar “Akciza”, i finalizuar më datë 06.10.2020, për goditjen e veprimtarisë kriminale në fushën e kontrabandës me mallra për të cilat paguhet akcizë, nga strukturat e DVP Tiranë u bë kapja dhe ndalimi i shtetasit K. G., 45 vjeç, të cilit Gjykata e Shkallës së Parë Tiranë i ka caktuar masën e sigurimit “Arrest në burg”, për veprën penale “Shpërdorimi i detyrës”,”-njoftimi i Policisë së Shtetit.
Gradeci, gjithashtu ish-kreu i Operatorit të Sistemit të Transmetimit në Ministrinë e Infrastrukturës, u shpall në kërkim nga Policia e Shtetit disa ditë më parë, bashkë me disa zyrtarë të tjerë të institucionit. Sipas Prokurorisë së Tiranës, Gradeci bashkë me dy biznesmenët Isuf Berberi dhe Naim Kasa, të dy pronarë të kompanisë “Phoenix Petroleum” i kanë marrë nga shtetit 1.5 milionë dollarë nga buxheti për shërbime që nuk i kanë kryer.
Dy biznesmenët kanë paraqitur në AKBN fatura fiktive për pastrimin e puseve të naftës, ndërsa zyrtarët kanë bërë kontroll fiktiv, duke firmosuar shkresat në këmbim të parave.