Ekzekutimi i vëllait të Talo Çelës/ Identifikohet personi që dyshohet se dha porosinë, figurë e njohur e botës së krimit

Bujar Çela u vra mëngjesin e 17 shtatorit në afërsi të një lokali në Bradashesh të Elbasanit.

Ai njihet dhe si vëllai i një prej personave më të kërkuar nga policia, Talo Çelës.

Ditën e atentatit, tre persona të maskuar si policë kanë zbrazur 20 plumba, ku njëri prej tyre ishte i armatosur me pushkë dhe 2 të tjerët me pistoleta.

Të pashqetësuar, ata i kanë shkarkuar vdekjen e menjëhershme Çelës.

Sipas A2, është zbardhur vrasja e Bujar Çelës dhe mësohet porositësi i kësaj vrasje dyshohet të ketë qenë Erion Alibej, i arrestuar më 18 shtator, pasi akuzohet si porositësi i dy vrasjeve të ndodhura më datë 20 korrik në qytetin e Elbasanit, në lagjen “28 Nëntori”, ku u vra me armë zjarri shtetasi Emiljano Ramazani dhe i vrasjes së ndodhur më datë  29.07.2020, në afërsi të varrezave të qytetit, ku mbeti i vrarë me armë të ftohtë shtetasi Regis Runaj. Aktualisht, ndaj Alibejt është dhënë masa e sigurisë arrest me burg.

Erion Alibej është vëllai i Endrit Alibej, i cili mbeti i vrarë në aksin Elbasan-Metalurgji, teksa u qëllua me breshëri. Të vdekur mbetën daja i tij Arben Dylgjeri dhe Erdal Durunay, shtetas turk, mik i Endritit.

Erion Alibej është me precedent penal dhe në Itali njihej me emrat Erion Dylgjeri dhe Andrea Alibej. Vrasjet dyshohet të jenë kryer për hakmarrje.

Më 4 qershor të vitit 2013, Endrit dhe Erion u vunë në pranga nga autoritetet italiane në kuadër të operacionit të koduar “Cocash”. Në saj të këtij operacioni u shkatërruan dy grupe të trafikut të drogës. Në dy shtëpitë e vëllezërve në Itali, pas arrestimit u sekuestrua 15 kg kokainë.