Sot në mëngjes kryeministri Edi Rama u kërkoi grave naftëtare të Ballshit që të ndërprisnin grevën e urisë dhe të flisnin me të “vëllazërisht” për hallin që u ka rënë.
Por përgjigja e protestueseve ka qenë e mënjëhershme.
“I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu!Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm”, shkroi Rama në rrjetet sociale.
Por gratë nuk kanë qendruar indiferente pas kësaj thirrjeje.
Ato kanë deklaruar se vetëm të vdekura do dalin nga kjo grevë, pasi sipas tyre dhe në vitin 2017 Rama u premtoi që do i jepte rrogat, por deri më tani asnjë prej tyre nuk i ka tërhequr paratë.
“Ta harroj kryeministri se do dalim nga greva. Këtu do vdesim. Të vijë vetë krtyeministri këtu e pastaj flasim. Duam zgjedhje. Ne duam lekët e prapambetura dhe pastaj rifillimi i punës. Nuk kemi më besim. Të vijë dhe ministrja Balluku. Jam me naftëtarët thotë ai, po pse ky është reagimi, të ndërpresim grevën?”, tha një grua naftëtare. “Deri në vdekje do rrimë këtu. Ne sytë dhe veshët te kryeministri dhe Balluku i kemi. Dhe ne që jemi këtu duam të ishim në familjet tona”, tha një tjetër.
Një tjetër grua naftëtare tha se kryeministri Rama është i mirëpritur në Ballsh, por të ketë zgjidhje konkrete sepse në të kundërt ata nuk e ndërpresin grevën. “Ne nuk e ndërprëesim grevën se në 2017 Rama na tha do t’ju japim lekët. Ne lekët si kemi marrë akoma. Po të na hedhi lekët kryeministrri në rregull jemi. Ne nga kryeministri e presim zgjidhjen. Ai është i pari i vendit. Të vijë këtu, të bëjëm një takim sipas rregullave”, tha një tjetër naftëtare.