“Do shkoj të takoj kryetarin, të më ngjisë Covidin” Kujtim Gjuzi me naftëtarët grevistë: Është rrenë ndërkombëtare

Sot deputeti i opozitës së re Kujtim Gjuzi ka zhvilluar një takim me naftëtarët e Ballshit të cilët janë futur në grevë urie prej tre javësh tashmë.

Teksa ndodhej aty, pasi u ka dhënë dorën një nga një, Gjuzi është shprehur se do të ngrejë zërin në parlament për çështjen e tyre.

Por më pas ai ka deklaruar se do të shkojë të takojë edhe kryetarin e Sindikatës së Naftëtarëve të Ballshit, Sokol Dautaj, i cili ka rezultuar pozitiv me koronavirus.

Ai është shprehur se do ta takojë Dautajn duke thënë se COVID-19 nuk ekziston, duke e quajtur atë si një gënjeshtër ndërkombëtare.

“Të gjithë ata njerëz që kanë vjedhur uzinën, drejtësia vonon, por nuk harron. Ju keni kryetarin me COVID, do shkoj ta takoj atë le të jetë me 200 temperaturë, le të ma ngjis mua, se COVID-i është një rrenë ndërkombëtare, mashtrim për të na thënë s’duhet të punoj uzina këtu, kina atje. Garancia që në parlament, do ta ndez parlamentin nga nesër në orën 10 deri kur t’ju japin lekët”, tha Gjuzi, teksa shfaqet pa maskë.