“Vajza kishte tentuar të ishte pjesë e një klipi tallava”, Klodiana Lala tregon detajet e frikshme të historisë së Eglantina Bucit

Gazetarja Klodiana Lala ka treguar në emisionin “Opinion” detaje të tjera nga dosja e Eglantina Bucit. Ajo ka pohuar se në momentin e largimit nga shtëpia në fund të vitit 2008, Eglantina Buci i kishte marr familjes edhe 12 milionë lekë të vjetra.

Ndër të tjera, Lala ka thënë se Faik Buci ishte i obsesionuar pas të bijës, dhe ka treguar se pas divorcit të prindërve, nëna e Eglantina Bucit nuk e ka takuar kurrë të bijën dhe as tre fëmijët e tjerë. Madje, nëna e 4 fëmijëve nuk është lejuar të shkojë as në funeralin e djalit që vdiq në vitin 2014 pas një sëmundjeje.

“Nëna nuk është lejuar të shkojë në varrimin e të birit dhe e ka mësuar shumë vonë varrin e tij nga një grua e zonës”, tha gazetarja.

Duke u shprehur se i ati kishte një pushtet absolut ndaj fëmijëve, Lala tha:

“Madje vajza kishte tentuar të ishte pjesë e një videoklipi të një këngëtari tallava dhe babai ishte përballur dhe konfliktuar me këngëtarin duke mos e lejuar. Babai ishte obsesiv ndaj vajzës. I vetmi njeri me të cilin mbante kontakte vajza ishte xhaxhai”.

Më tej gazetarja ka treguar se si Shkëlzen Buci ka infiltruar shokun e tij (tashmë dëshmitar i penduar) për të hyrë në kontakte me të motrën, e cila prej 4 vitesh kishte shkëputur çdo komunikim me familjen.