Ditën e djeshme një ngjarje e rëndë terrorizoi Elbasanin, duke ngritur në këmbë dhe forcat e policisë.
Lefter Zhidru, 71 vjeçari nga fshati Xarrë i Sarandës, u ekzekutua nga forcat RENEA në banesën e tij ku jetonte prej pesë vitesh.
Ai ishte i armatosur me një automatik kallashnikov, ndërsa u raportua se në banesën e tij u gjenden dhe kallëpe me tritol dhe ndezës.
Por pas 5 orësh përpjekje për ta bindur të dorëzohej, i moshuari u godit me plumb në kokë nga një prej snajperave të forcave speciale.
E gjitha nisi si pasojë e një konflikti familjar, i cili precipitoi kur 4 policë shkuan në banesën e 71-vjeçarit, por u gjenden para breshërisë së plumbave.
Madje për pasojë mbetën të plagosur dhe dy të rinj kalimtarë të rastit.
Që prej pasdites së djeshme trupi i pajetë i 71-vjeçarit ndodhet në morgun e qytetit, dhe asnjë prej familjarëve të tij nuk ka pranuar ta tërheqë.
Madje policia ka ndaluar edhe bashkëshorten e 71-vjeçarit, një shtetase 41 vjeç, e cila mund të akuzohet për moskallëzim krimi. Mbi të rëndon fakti se nuk ka treguar për armët dhe municionet që iu gjetën në banesë të moshuarit.
Policia publikoi mbrëmjen e djeshme pamje nga shenjat që kishin lënë plumbat e qitur nga arma që përdorej nga Zhidru te mburojat anti-plumb të forcave RENEA.