Tiranë/ Kapet 30-vjeçari në rrugën ‘Myslym Shyri’, ja çfarë po shiste. Procedohet klienti

Një 30 vjeçar është arrestuar nga policia e Tiranës për shitje të lëndëve narkotike, si dhe është proceduar penalisht një nga klientët.

Blutë e kryeqytetit bëjnë me dije së në kuadër të operacionit të koduar “Zona”, ka rënë në pranga 30-vjeçari me iniciale E.M banues në Tiranë, posedues dhe shpërndarës i lëndës narkotike si dhe u procedua në gjendje të lirë klienti M.P.

Nga Seksioni për Hetimin e Narkotikëve është marrë informacion në rrugë operative se E. M. posedonte lëndë narkotike dhe merrej me shpërndarjen e saj në zonën e “Myslym Shyrit”, Tiranë.

Mbi bazën e këtyre informacioneve, policia ka nisur kontrollet tek “Myslym Shyri”, ku mbrapa një karburanti ka konstatuar E. M, duke i shitur lëndë narkotike M.P.

Në vijim, Policia gjeti të fshehur në hyrje të një pallati një sasi dozash me lëndë narkotike dhe gjatë kontrollit të banesës i gjeti edhe një sasi tjetër lënde narkotike gati për ta ndarë në doza, gjithsej 720 gramë kanabis.

Dosja e tij i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore.