“Po më doli para, e vras” Dëshmia e babait që akuzohet se i mori jetën së bijës: Është gjallë dhe pr*stitutë

Akuzohet se ka vrarë vajzën e tij Eglantina Buci, së bashku me djalin e tij në vitin 2012 duke fshehur eshtrat në Malin me Gropa.

Bëhet fjalë për 66-vjeçarin Faik Buci, i cili ka dëshmuar përpara oficerëve të policisë duke mohuar gjithcka në deklaratën e tij.

Ai thotë se vajzën e ka gjallë dhe që vazhdon të prostituojë, veprime këto që sipas tij nuk janë të denja dhe për pasojë ka mohuar të bijën.

Ndërkohë mësohet se gjatë deklaratës së tij ka thënë: “Eshtrat në Malin me Gropa nuk i përkasin vajzës time. Eglantina është gjallë dhe është prostitutë. Unë e kam mohuar si fëmijë. Edhe sot po të më dalë para e vras”.

Faik Buci ka dhënë ndërkohë deklarata kontradiktore para grupit hetimor. Pavarësisht se i ka qëndruar tezës se vajza e tij është jashtë dhe nuk e ka vrarë, në disa momente ka patur luhatje në deklarime.

Ai është shprehur se nuk do t’i pranonte eshtrat e së bijës, pasi e kishte mohuar. Në bazë të këtyre deklarimeve mund të kërkohet edhe një kontroll mendor nga mjekët. Sot në orën 12:00 pritet që të jepet masa e sigurisë për të dhe të birin.

Kujtojmë se disa ditë më parë, policia zbardhi vrasjen duke sqaruar se babë e bir i morën jetën 23-vjeçares dhe e groposën në Malin me Gropa. Arsyeja që i shtyu të vrisnin të renë, ishte fakti se ajo kishte nisur të bashkëjetonte me një djalë, të cilën familja nuk e pranonte.

Këtë veprim familja e quajti ç’nderim dhe për muaj planifikoi vrasjen e të resë, e cila nuk pranonte të takonte të afërmit e saj.

Një ditë 23-vjeçarja kishte lënë një takim në një lokal në zonën e Freskut, ku e priste i vëllai. Ky i fundit nën kërcënimin e armës e mori vajzën me makinë dhe e çoi në malin e Dajtit ku e ekzekutoi me plumb në kokë.

Eshtrat e trupit të pajetë u nxorën në sipërfaqe për shkak të kafshëve të egra dhe u zbuluan nga policia.