Kryetari i Bashkisë së Tiranës Erion Veliaj njoftoi para disa ditësh se pas një periudhë kohë i izoluar dhe me kujdes shëndetësor maksimal, kishte arritur të mposhtte COVID19.
Së fundmi ai mësohet se është shprehur i gatshëm që të ndihmojë personat e prekur duke dhuruar plazmën e gjakut të tij.
Gjatë fjalës në Këshillin Bashkiak, Veliaj ka ftuar gjithashtu dhe anëtarë të tjerë që të dhurojnë plazmën e cila po konsiderohet si një kurë për të prekurit.
“Do jem i pari nga Bashkia si kryetar që do dhuroj plazmën për ata që kanë nevojë për këtë trajtim. Ndërkohë që ftoj të gjithë anëtarët e tjerë (që e kanë kaluar) të bëjnë të njëjtin veprim. Ka stigmë për ata që nuk dhurojnë, kur njerëzit kanë frikë dhe një lloj droje. Lipset solidaritet për ata që kanë droje që ta bëjnë këtë”- u shpreh kryebashkiaku.
Më herët, Veliaj rrëfeu se ishte djali i tij i cili ishte infektuar i pari. Më pas virusin e kishte marrë bashkëshortja e tij, Ajola dhe më pas kishte kaluar edhe tek vetë kryetari i bashkisë.
“Ishin takime jashtë pune. Asnjë nga kabineti i punës nuk rezultoi pozitiv, kështu që unë isha i vetmi. Ne e kaluam të gjithë në shtëpi, fillimisht u sëmur djali, me temperaturë 38, menduam se kishte dhëmballë, më pas hetimi profesional tregoi që kishte kaluar ai COVID, bashkëshortja dhe pastaj unë. Dhe u futa në karantinë. Ishin dy javë sfiduese, nuk ia uroj as armikut më të madh. Pak kujdes nuk na bën keq”- ka treguar ai.
