Pacienti u hodh nga kati i katërt, reagon spitali “Shefqet Ndroqi”: Kishte një ditë i shtruar, ja si po trajtohej

Pas ngjarjes së rëndë mbrëmjen e djeshme, ku 65-vjeçari Hasan Mira u hodh nga kati i katërt i spitalit “Shefqet Ndroqi” ku ishte i shtruar me COVID19, ka ardhur dhe reagimi zyrtar i këtij institucioni.

Në një njoftim të shkurtër, stafi i këtij spitali bën me dije se viktima kishte vetëm një ditë i shtruar aty dhe virusi i kishte shkaktuar pneumoni.

“Stafi i spitalit universitar “Shefqet Ndroqi” shpreh dhimbjen për humbjen e jetës së 65-vjeçarit me inicialet H.M, i cili i dha fund jetës mbrëmjen e sotme dhe i shpreh ngushëllimet më të sinqerta familjes së tij në këto momente të vështira. 65-vjeçari ishte shtruar një ditë më parë në spitalin “Shefqet Ndroqi”, me pneumoni të shkaktuar si pasojë e virusit SARS COV2 dhe po trajtohej me terapinë e plotë të mjekimit”, thuhet në reagimin zyrtar.

Gjithashtu në reagim thuhet se: “Duke shprehur edhe një herë dhimbjen për këtë ngjarje të rëndë, stafi i spitalit universitar “Shefqet Ndroqi” siguron qytetarët se po vijojë të jetë në shërbim 24/7 për të garantuar shërbimin shëndetësor për pacientët që trajtohen në spitalin tonë”.