OFL zbret në jug të vendit, kush janë 4 ‘të fortët’ që duhet të deklarojnë pasurinë (EMRAT)

Operacioni Forca e Ligjit ka dërguar sot formularin për deklarimin e pasurisë 4 personave të dënuar për prodhim dhe shitje lëndësh narkotike.

Mësohet se ata janë: Mirald Meça, Kreshnik Gërveshi, Ali Basha, Raul Skënderi.

Mirald Meca 28 vjeç, më herët punonjës i drejtorisë së burgjeve së Telepenës, në 2017 është arrestuar së bashku me shokun e tij, pasi lëviznin të armatosur në aksin Tiranë-Rinas.

Kreshnik Gërveshi banues në Gjirokastër, i dënuar për veprën penale “Kultivimi i bimëve narkotike”;

Ali Basha, banues në Gjirokastër, i dënuar për veprën penale “Kultivimi i bimëve narkotike”;

Raul Skënderi banues në Tepelenë, dënuar për veprën penale “Prodhimi dhe shitja e narkotikëve”, kryer në bashkëpunim.

NJOFTIMI ZYRTAR I POLICISE

Vijon pa ndërprerë Operacioni Forca e Ligjit, në zbatim të detyrave të përcaktuara në Aktin Normativ të datës 31 janar 2020.

Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë, shtetasve:

1. M., banues në Tepelenë, i dënuar për veprën penale “Prodhimi dhe shitja e narkotikëve”;
2. G., banues në Gjirokastër, i dënuar për veprën penale “Kultivimi i bimëve narkotike”;
3. B., banues në Gjirokastër, i dënuar për veprën penale “Kultivimi i bimëve narkotike”;
4. S., banues në Tepelenë, dënuar për veprën penale “Prodhimi dhe shitja e narkotikëve”, kryer në bashkëpunim.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.

OFL është në veprim të pandërprerë dhe në kryerje të veprimeve komplekse për vendosjen e sekuestrove emergjente mbi pasuritë e dyshuara të përfituara nga krimi, si dhe për dërgimin e formularëve të vetëdeklarimit të gjithë personave që janë subjekt i Ligjit Special.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.