“O sot, o kurrë” Meta nuk i ndal mesazhet e forta: Të bashkohemi për të shpëtuar Shqipërinë

Presidenti Ilir Meta nuk i ndal mesazhet e forta.

Të njëjtën gjë ka bërë dhe sot, në kuadër të 78-vjetorit të Konferencës së Pezës.

Sipas Kreut të Shtetit, mesazhet e Pezës janë aktuale dhe sot kur Shqipëria ndodhet përballë një pushtimi të ri, nga një sekt dhe bandë oligarkësh.

“Pezë do të thotë Shqipëria mbi të gjitha! Pezë do të thotë bashkim, kushtrim dhe qëndresë, pa dallim feje, krahine dhe ideje në mbrojtje të interesit kombëtar.

Mesazhet që përcjell edhe sot, pas 78 vitesh, Konferenca e Pezës janë më aktuale se kurrë për të lënë mënjanë ndasitë e interesat afatshkurtra, dhe për t’u bashkuar kundër një pushtimi të ri nga një sekt e një bandë oligarkësh që kanë uzurpuar institucionet dhe kanë marrë peng të ardhmen e çdo shqiptari dhe atë europiane të vendit tonë.

Peza është një amanet: Besa-besë për të shpëtuar Shqipërinë! O SOT, O KURRË”, shkruan Meta i revoltuar.