Ende pa u futur në muajin Tetor, moti pati një ndryshim drastik, nga shumë nxehtë në mot të ftohtë.
Për ta shpjeguar më mirë situatën, meteorologu i Meteoalb Hakil Osmani, ka zbuluar sesi do vijojë të jetë moti në ditët e para të muajit Tetor. Sipas Osmanit, priten përmirësime të motit që prej ditës së sotme dhe një rritje graduale e temperaturave në 28 dhe 29 gradë celsius.
Megjithatë, nuk përjashtohet mundësia e rrebesheve të shiut në zonat malore, ku edhe ato paraqiten të jenë kryesisht të izoluara.
“Moti gjatë këtyre ditëve pritet të ketë një përmirësim, do të kemi mot të qendrueshëm, me më shumë kthjellime, por ka dhe reshje shiu të pakta të izoluara. Do të kemi dhe një rritje graduale të temperaturave, që në fundjavë do të shkojnë deri në 28 apo në 29 gradë celsius.
Java e parë e muajit Tetor paraqitet me mot të qendrueshëm, mund të ketë rrebeshe shiu, kryesisht në zonat veriore dhe veriperëndimore. Ditët e para të Tetorit në bregdet dhe në zonat e ulëta do të jenë me mot të mirë. Sa i takon temperaturave, ato do të jenë më të larta sesa normale, nga 2 deri në 3 gradë”, u shpreh Osmani në Fax News.