Serbia nuk do ta përmbushë premtimin e saj për ta zhvendosur ambasadën e saj në Jerusalem nëse Izraeli e njeh Kosovën, ka thënë të mërkurën një burim i afërt me qeverinë serbe për “The Times of Israel”. Burimi ka shtuar se njohja formale e pavarësisë së Kosovës nga Izraeli do të “shkatërronte” marrëdhëniet e shtetit hebre me Serbinë.
“Kjo do të mund të përfundonte me shumë telashe, përveç nëse do të kishte një kompromis se çfarë raporti do të ketë Izraeli me Kosovën”, ka thënë ky burim në kushte anonimiteti, transmeton Zeri.info.
“Marrëdhëniet diplomatike me Kosovën janë një gjë, njohja si shtet i pavarur një gjë krejtësisht tjetër. Kjo do të shkatërronte marrëdhënien Izrael-Serbi”, tha burimi serb.
Burimi shtoi se “shumë kanë argumentuar se vendimi i Izraelit duke njohur Kosovën, do të ishte i ngjashëm me vendet që njohin në mënyrë të njëanshme Palestinën”.
Duke folur për “The Times of Israel”, burimi serb, i cili tha ta ketë takuar Vuçiqin disa herë ditëve të fundit, përfshirë edhe një takim pas ceremonisë në Ëashington, theksoi se njëfarë “marrëdhënie diplomatike” mes Jerusalemit dhe Prishtinës do të ishte e pranueshme, por jo edhe njohja formale e Republikës së Kosovës si shtet sovran.
“Mund të ju them se Serbia nuk do ta zhvendosë ambasadën e saj në Jerusalem nëse Izraeli e njeh Kosovën si shtet të pavarur”, tha burimi. “Për më tepër, ky hap nga Izraeli do të dëmtonte marrëdhënien intime mes Izraelit dhe Serbisë dhe kurrë më nuk do të jetë e njëjtë. Është kaq e thjeshtë. Izraelitët duhet ta kuptojnë këtë”.
I pyetur nëse Serbia është pajtuar taktikisht që Kosova dhe Izraeli të krijojnë marrëdhënie, burimi tha se dy palët kanë nënshkruar dokumente të ndara. “Dokumenti që Vuçiqi e nënshkroi nuk thotë asgjë për njohjen e Kosovës nga Izraeli”. Ambasada serbe në Tel Aviv nuk është përgjigjur për këtë artikull.