LIGJET E BIZNESIT
Mjeku infeksionist Pëllumb Pipero ka marrë një titull të lartë duke u shpallur qytetar nderi në Skrapar.
Ka qenë Bashkia e Skraparit e cila me anë të një ceremonie zyrtare i ka dhënë Piperos titullin e akorduar gjatë periudhës së karantinës.
Në këtë kohë u tha se do të organizohej dhe një festë për Piperon dhe po parashikoheshin fondet për drekën, por asokohe mjeku refuzoi të bëhej festë e tillë në emër të tij.
Pipero u shpreh i emocionuar gjatë fjalës së mbajtur se është i nderuar për titullin që merr sot dhe u zotua se do të vijojë të punojë me përgjegjësi.
“Nuk e kam të lehtë të flas sot. Të nderuar të pranishëm, ndihem i emocionuar, pak i befasuar për titullin e madh që marr sot nga Këshilli Bashkiak i Skraparit me iniciativën e qytetarëve dhe kolegëve. Është obligim i madh, nder i madh dhe përgjegjësi e madhe të kesh titull qytetar nderi të Skraparit që nuk i kanë munguar as burrat as gratë. Një duartrokitje të madhe për ata që kanë nderuar dhe vazhdojnë ta nderojnë Skraparin. Kjo pandemi evdentoi shumë vlera të shoqërisë njerëzore, mirëkuptim, respektim të disa normave të veçanta.
Në këtë pandemi shumë, ndoshta të gjithë kolegët e mi kemi bërë dhe bëjmë çdo ditë atë që ky moment na e solli për ta bërë. Kemi bërë detyrën dhe jo më shumë. Shumë kolegë të mi ndoshta kanë bërë shumë më tepër se unë. Unë si pjesë e kësaj gjenerate mjekësh do vazhdojmë të bëjmë detyrën. Sa mirë e kemi bërë, e dini ju. Dua t’ju falenderoj me zemër dhe t’iu them se titulli që më jepni sot më obligon akoma më shumë. Unë dhe familja ime do t’ju jenë mirënjohës për gjithë jetën. Ju faleminderit”, tha Pipero.
Në ceremoni ka qenë i pranishëm edhe gazetari Artan Hoxha, i cili ka shpërndarë disa foto në rrjete sociale.
“Me doktor Pellumb Piperon dhe kryetarin e Bashkisë Skrapar, Adriatik Mema, pas ceremonisë së shpalljes “Qytetar Nderi i Skraparit”…
Çorovodë 18 shtator 2020…”, shkruan gazetari Hoxha.
