Festa e ditëlindjes përfundoi me plumba/Konsumuan alkool dhe drogë në lokal, si u qëllua me plumba 30 vjeçari në mes të Tiranës

Detaje të reja kanë dalë nga plagosja me armë zjarri e 30-vjeçarit Rexhep Gjelit në lagjen “5 Maji “në Tiranë. Burime për Dosja.al bëjnë me dije se ngjarja e rëndë ndodhi ditën e tij të lindjes së 30-vjeçarit, teksa ky i fundit ishte duke festuar në një lokal në lagjen “5 maji” në kryeqytet me autorin e ngjarjes, Kevin Cungu.

Të njëjtat burime bëjnë me dije se 18-vjeçari ka qenë së bashku me Rexhep Gjelin në një tavolinë dhe fillimisht ata kanë nisur që të debatojnë brenda në lokal. Dyshohet se autori dhe i plagosuri kanë konsumuar alkool dhe lëndë narkotike dhe pas sherrit Cungu i ka kërkuar që të dalin për sqarim jashtë lokalit. Pak minuta më vonë, gjatë një sherri jashtë lokalit 18-vjeçari ka qëlluar me armë zjarri në këmbë 30-vjeçarin.

Mësohet se 18 vjeçari ka qenë i veshur me bluzë të bardhë dhe pantallona të shkurtra dhe është identifikuar menjëherë nga policia. Ndërkohë, efektivët kanë kryer edhe kontrolle në banesën tij në Tiranë.

Ngjarja e rëndë ndodhi mbërmjen e djeshme në Tiranë. 30-vjeçari Rexhep Gjeli u qëllua me armë zjarri në këmbë nga Kevin Cungu, i cili është vëllai i grabitësit të njohur Markeljan Cungu. Autori i ngjarjes është në kërkim nga Policia.