LIGJET E BIZNESIT
Nuk është hera e parë që politikanë të ndryshëm fitojnë betejën me drejtësinë në Shqipëri.
Së fundmi, dy prej tyre janë dhe deputetët e opozitës së re Myslym Murrizi dhe Artur Roshi.
Ata kanë fituar gjyqin me Kuvendin, në lidhje me 3 pagat që nuk morën gjatë pandemisë nga muajt mars e deri në maj.
E gjitha kjo erdhi pas vendimit të marrë nga Kuvendi, i cili vendosi që në atë periudhë deputetëve tu mbahej rroga 50% për 3 muaj për të përballuar situatën dhe krizën e krijuar nga pandemia COVID19.
Ndërkohë sipas asaj që bën me dije “ReportTv”, në vendimin e Gjykatës Administrative së Shkallës së parë, thuhet se dhurimi i pagës është diçka e vullnetshme dhe jo kolektiv, pasi mandati i deputetit është individual.
“Gjykata thekson se mandati i deputetit është individual dhe përgjegjësia mbi sjelljen e gjithsecilit mbi këtë mandat shihet rast pas rasti dhe nuk mund të justifikohet me sjellje kolektive. Në rastin konkret, ndalesa e pjesshme në masën 50% të pagës mujore neto për paditësit Myslim Murrizi dhe Artur Roshi është bërë në kundërshtim me ligjin pasi situata e rëndë ekonomike e shkaktuar nga COVID-19, nuk përbën shkak të përligjur për cënimin e pagës së deputetit, pasi sikurse u theksua më sipër, dhënia e kontributit financiar me qëllim përballimin dhe lehtësimin e kësaj situate është një akt i vullnetshëm dhe jo i detyruar”, thuhet në arsyetimin e gjykatës.
