LIGJET E BIZNESIT
Epidemiologu Dritan Ulqinaku ka folur për situatën e pandemisë COVID19 në vënd, në prag të nisjes së vitit të ri shkollor.
Ai ka folur me nota optimiste duke thënë se ky moment nuk do të sjellë një bum rastesh të reja, pasi fëmijët nuk kanë ardhur nga izolimi dhe nëse do të zbatohen me kujdes masat e higjenës nuk do të ketë të infektuar.
Ulqinaku deklaroi për Euronews Albania se përballimi i sezonit turistik me rreth 1 mln turistë nga rajoni që zgjodhën të pushonin në Shqipëri është një provë e madhe e kaluar sa i përket situatës nga COVID-19, çka sipas tij u reflektua në shifrat e rritura të muajit gusht.
“Shqetësimi ynë nuk janë fëmijët, është përcjellja e infeksionit te mësuesit dhe prindërit. Fëmijët nuk kanë qenë të izoluar, kanë qenë gjithë kohës jashtë duke luajtur me njëri-tjetrin, ndaj nuk presim një bum infektimesh”, tha mjeku teksa sugjeroi se një maskë e thjeshtë pëlhure do ta kryente më së miri funksionin.
Duke iu referuar numrit të viktimave nga COVID-19 në vendin tonë, mjeku tha se është e vështirë të bësh analiza në këtë aspekt, pasi sipas tij ky virus është shumë specifik, individual, ndaj është e kotë të bësh krahasime me vende të tjera.
“Por lufta është e egër për ata pacientë me të cilët virusi sille në mënyrë të egër”, tha epidemiologu.
Ai shpjegoi se mosha më e prekur nga virusi aktualisht në vendin tonë është mosha aktive për punë, nga 40-60 vjeç dhe më pak moshat mbi 60 çka tregon një ndërgjegjësim të këtyre të fundit për të shmangur ekspozimin.
“Mosha 40-60 vjeç që e kanë kaluar COVID-19 janë tashmë më të mbrojtur, e kanë marrë në një farë mënyrë vaksinën dhe janë të aftë të jenë në frontin e parë për gjithçka”, tha epidemiologu.
